Metsala Mercedes Benz

Mikil sala Mercedes Benz bíla heldur áfram um allan heim og var apríl mánuður sá besti frá upphafi og jókst sala Benz um 11% á milli ára. Sala Mercedes Benz bíla hefur nú vaxið í 38 mánuði samfellt og dregur framleiðandinn mjög á BMW sem stærsti lúxusbílasali heims. Reyndar gæti farið svo í ár að Benz næði BMW í heildarsölu.

Á fyrstu 4 mánuðum ársins hefur sala Mercedes Benz bíla vaxið um 12% frá fyrra ári og fyrirtækið selt 647.550 bíla og 164.063 í apríl einum. Ný gerð E-Class og nýjar blæjuútgáfur SL, SLC og S-Class Cabriolet juku verulega við söluna á síðustu mánuðum og nýjar gerðir Benz bíla hreinlega streyma útúr verksmiðjum Benz um allan heim.

Sala Benz í Evrópu er sérlega góð og jókst hún um 14% í apríl og um 11% í Þýskalandi. Vöxturinn var þó öllu meiri í Kína, en þar jókst hún um 32%. Salan í Bandaríkjunum stóð þó í stað. Sala Smart bíla, sem tilheyra Mercedes Benz gengur líka vel og jókst um 10% í apríl en hefur vaxið um 20% á fyrstu 4 mánuðum ársins. Það eru því gleðilegir tímar í höfuðstöðvum Mercedes Benz um þessar mundir.