Sjáðu Tiger setja þrjú högg í röð í vatnið

Tiger Woods átti erfiða stund á fjölmiðladegi í gær fyrir Quicken Loans-mótið sem fer fram í lok júní.

Woods stillti sér upp á teig á par þrjú holu og fékk þrjár tilraunir til að koma sér yfir vatnið sem var á milli teigs og flatar. En honum mistókst í öll þrjú skiptin eins og sjá má hér fyrir neðan.

„Þess vegna þarf ég upphitun,“ sagði hann eftir þriðja höggið en hann hafði áður kvartað undan stífleika.

Óvíst er hvort að Tiger muni spila á Opna bandaríska meistaramótinu um miðjan júní og svo Quicken-Loans mótið sem er viku síðar.

Hann sagði að hann fengi þessa spurningu oft - hvenær hann myndi spila næst. „Ég hef verið að æfa mig heima og það hefur gengið vel. Ég vildi gjarnan geta sagt hvenær ég spila næst en ég veit það bara ekki.“

Tiger sagði enn fremur að hann hefur ekki afskrifað þann möguleika að bæta met Jack Nicklaus sem vann átján risamót á ferlinum, né heldur met Sam Snead sem vann 82 PGA-mót. Tiger hefur unnið 79 PGA-mót og fjórtán risamót.