Rúrik í byrjunarliðinu annan leikinn í röð

Rúrik Gíslason var í byrjunarliði Nürnberg annan leikinn í röð þegar liðið tapaði 3-1 fyrir Eintracht Braunschweig á útivelli í dag.

Rúrik Gíslason var frá í sjö mánuði vegna meiðsla á hásin en er kominn aftur á ferðina með Nürnberg-liðinu sem er í 3. sæti þýsku B-deildarinnar.

Liðið sem endar í 3. sætinu mætir liðinu sem endar í 16. sæti þýsku úrvalsdeildarinnar í umspili í um sæti í efstu deild á næsta tímabili.

Rúrik fór af velli á 59. mínútu, strax eftir að Ken Reichel kom Braunschweig í 2-0.

Nürnberg hefur tapað þremur af síðustu fjórum leikjum sínum en er samt nokkuð öruggt í 3. sætinu. Fimm stigum munar á Nürnberg og Leipzig, sem er í 2. sæti deildarinnar.