Tiger Woods missir af Masters mótinu vegna meiðsla

Tiger Woods hefur tilkynnt að hann muni ekki vera með á Masters mótinu í golfi sem hefst á fimmtudaginn á Augusta National vellinum í Georgíu. Þetta er í annað sinn á síðustu þremur árum sem hann missir af þessu móti.

Tiger hefur verið frá keppni frá því í september en þá gekkst hann undir aðgerð á baki. Þau meiðsli eru enn að hrjá hann.

"Eftir að hafa metið núverandi ástand á bakinu og ráðfært mig við læknateymið mitt, þá hef ég ákveðið að það sé skynsamlegast að sleppa Masters mótinu í ár," segir í yfirlýsingu frá Woods.

"Ég er búinn að slá bolta og æfa daglega en ég er ekki tilbúinn líkamlega. Ég hef sagt það alla tíð að ég verð að fara varlega og gera það sem er best fyrir heilsu mína og feril til framtíðar. Ég er að taka framförum og ég er mjög ánægður með hve langt ég er kominn í endurhæfingu. En ég hef ekki ákveðið hvenær ég sný aftur á golfmót," segir ennfremur í yfirlýsingu frá Tiger Woods.