Trump spáir því að Denver vinni Super Bowl

Forsetaframbjóðandinn Donald Trump hefur trú á því að Denver Broncos vinni Super Bowl-leikinn á sunnudag.

Þá mæta Peyton Manning og félagar liði Carolina Panthers sem tapaði aðeins einum leik í vetur og hefur leikið hreint út sagt stórkostlega.

„Carolina er vissulega heitt lið og leikstjórnandinn hefur verið frábær. Ég hef alltaf verið hrifinn af Peyton Manning. Hann er góður gaur og ég verð að spá þeim sigri sem ég þekki,“ sagði Trump en þetta er vissulega áhugaverð nálgun í spá.

„Hitt liðið lítur hrikalega vel út og er eflaust spáð sigri. Ég held mig samt við Peyton því hann er svo góður gæi.“

Trump var reyndar búinn að spá því að Tom Brady og félagar í New England Patriots myndu vinna Broncos og síðan fara alla leið. Hann spáði því þar sem Brady var líka svo góður gæi í hans augum.

Super Bowl verður í beinni útsendingu á Stöð 2 Sport á sunnudaginn.