Grand Cherokee Hellcat á næsta ári

Fiat/Chrysler fyrirtækið sem framleiðir einnig Dodge og Jeep bíla hefur nú í nokkurn tíma boðið Dodge Challenger og Charger bíla með 707 hestafla Hellcat vél sem eðlilega er með öflugustu vélum sem í boði eru í fjöldaframleiddum bílum.

Fyrirtækið ætlar ekki að láta staðar numið þar með bílgerðir sem fá munu þessa aflmiklu vél því til stendur að bjóða Jeep Grand Cherokee SRT með þessari vél á næsta ári, líklega nær enda þess árs. Hellcat vélin sem fer í jeppann er 6,2 lítra V8 með keflablásara og ætti að skila honum sæmilega áfram, ekki síst í ljósi þess að hann er að sjálfsögðu fjórhjóladrfinn.

Kannski verður hann fyrir vikið fljótari úr sporunum en Dodge Challenger og Charger. Jeep Grand Cherokee mun fá mikla samkeppni annarra öflugra jeppa þegar hann loks verður í boði. Sú samkeppni mun helst koma frá BMW, Mercedes Benz, Land Rover og Porsche.  Enginn bíla þeirra er þó með jafn öfluga vél í bílum sínum og munar þar frá 130 til 157 hestöflum í samanburði við Hellcat vélina.