Getum verið stoltir af spilamennskunni

Þýskaland spilar ekki um verðlaunasæti á HM í Katar en það varð ljóst eftir að lærisveinar Dags Sigurðssonar töpuðu fyrir heimamönnum, 26-24, í 8-liða úrslitum keppninnar í Lusail-höllinni í gær.

Þjóðverjar voru ólíkir sjálfum sér miðað við frammistöðuna á mótinu til þessa. Þýskaland fékk þó tækifæri til að minnka muninn í eitt mark á lokamínútum leiksins en Daniel Saric, bosníski markvörðurinn í liði Katars, varði í tvígang frá Patrick Grötzki úr dauðafærum sem gerði út um vonir Þjóðverja.

„Við byrjuðum ekki vel og ég hefði átt að skipta fyrr í 6-0 vörnina,“ sagði Dagur en þýska vörnin var í miklum vandræðum með línumanninn Borja Vidal framan af. „Eftir það vorum við miklu þéttari. En við vorum líka í vandræðum í sókn – báðar skytturnar byrjuðu illa og miðjumaðurinn var passívur.“

Niðurstaðan var auðvitað mikil vonbrigði en Dagur hrósaði engu að síður sínum mönnum. „Þetta er okkar fyrsta tap og við getum verið stoltir af spilamennsku okkar í dag [í gær]. Strákarnir börðust eins og ljón og nú þurfa þeir að rífa sig upp og koma sér í stand fyrir næsta leik.“

Þýskaland mætir Króatíu í fyrri leik sínum í umspilinu um 5.-8. sætið en liðin í 2.-7. sæti keppninnar fá þátttökurétt í undankeppni næstu Ólympíuleika.