Fyrstu myndir af nýjum Panamera

Náðst hafa myndir af nýjum Porsche Panamera og á þeim sjást nokkrar breytingar á bílnum, sérstaklega afturenda hans sem sannarlega léttir yfirbragð bílsins. Nýr Panamera fær ekki bara nýjan MSB undirvagn, heldur léttist bíllinn um hátt í 100 kíló með aukinni notkun áls og hástyrktarstáls.

Ennfremur fær bíllinn nýjar og eyðslugrennri V6 og V8 vélar sem þróaðar eru innanhúss eins og á við flestar vélar í Porsche bílum. Eyðslugrennst verður Panamera S E-Hybrid útfærslan og er hann knúinn rafmótorum til aðstoðar brunavél.

Fyrr á þessu ári skráði Porsche einkaleyfi á GT5 nafninu og bjuggust flestir við því að það væri gert fyrir mjög öfluga útfærslu Panamera. Það hefur ekki fengist staðfest og víst er talið að slík útfærsla yrði ekki kynnt samhliða kynningu nýrrar kynslóðar Panamera.

Forstjóri Porsche hefur sagt að ný Panamera verði kynnt á bílasýningunni í Genf í mars á næsta ári. Búist er við bílnum á markað á seinni helmingi næsta árs.