Atli áfram hjá FH

Samkvæmt heimildum íþróttadeildar 365 mun Atli Guðnason semja aftur við FH og leika með liðinu á næstu leiktíð. Þetta kom fram í kvöldfréttum Stöðvar 2.

Atli sagði á dögunum að óvíst væri hvað tæki við hjá sér. Til greina kæmi að fara frá FH, leika erlendis eða jafnvel hætta í knattspyrnu.

Sjá einnig: Atli Guðnason hefur mögulega spilað sinn síðasta leik

En nú hefur þeirri óvissu verið eytt og Atli mun leika með FH næstu árin. Hann hefur tvívegis verið kjörinn besti leikmaður Pepsi-deildar karla en hann hefur leikið með FH í meira en áratug.