Dortmund saxaði á forskot Bayern með dramatískum sigri

Shinji Kagawa skoraði sigurmark Dortmund á 93. mínútu í 2-1 sigri á útivelli gegn þýsku bikarmeisturunum í Wolfsburg en þetta var annar sigur Dortmund í röð sem er nú fimm stigum á eftir Bayern Munchen.

Eftir óvænt 1-3 tap Bayern gegn Borussia Mönchengladbach í dag fengu leikmenn Dortmund tækifæri til þess að saxa á forskot þýsku meistaranna og þeir komust verðskuldað yfir um miðbik fyrri hálfleiks.

Var þar að verki Marco Reus en leikmenn Wolfsburg færðu sig framar á völlinn eftir markið og uppskáru loks jöfnunarmark þegar dæmd var vítaspyrna á Lukasz Piszczek, varnarmann Dortmund á 90. mínútu.

Ricardo Rodriguez steig á punktinn og virtist hafa tryggt Wolfsburg eitt stig með jöfnunarmarkinu en leikmönnum Dortmund tókst að bæta við marki á 93. mínútu og var þar að verki Kagawa en þetta var þriðja mark hans á tímabilinu.