Volvo XC90 jeppi ársins 2016 hjá Motor Trend

Nýi Volvo XC90 var nýlega valinn jeppi ársins 2016 af bandaríska bílablaðinu Motor Trend. Þetta er í annað sinn sem Volvo XC90 fær þessi virtu verðlaun. Volvo XC90 er byggður með nýrri undirvagnstækni Volvo sem kallast Scalable Products Architecture eða SPA. 

Ný kynslóð fjögurra strokka Drive-E vélanna býður upp á spennandi akstur en með miklu minni eldsneytisnotkun og koltvísýringslosun. Eldsneytisnotkun nýju Drive-E D5 dísilvélarinnar í blönduðum akstri er aðeins 5,8 l/100 km og CO₂ losun er einungis 152 g/km.

Nýr Volvo XC90 setur ný viðmið varðandi öryggi bíla því hann býr yfir fullkomnasta öryggisstaðalbúnaði sem er fáanlegur á bílamarkaðnum í dag. Með Volvo XC90 voru frumsýndar tvær öryggisnýjungar, vörn við útafakstur og sjálfvirk bremsa ef beygt er í veg fyrir ökutæki úr gagnstæðri átt.

„Allir hjá Volvo Cars eru sérlega stoltir af þessum verðlaunum“ sagði Lex Kerssemakers, forstjóri Volvo Cars í Norður Ameríku við afhendingu verðlaunanna. „Nýr Volvo XC90 markar nýtt upphaf fyrir Volvo og það sem mun einkenna framtíðar Volvo bíla.“