Harpa: Skora úr næsta víti

Harpa Þorsteinsdóttir, leikmaður Stjörnunnar, var hógværðin uppmáluð þegar Vísir ræddi við hana eftir 6-0 sigur Íslands á Slóveníu í kvöld.

Íslenska liðið lék einkar vel í leiknum en Harpa var maður leiksins. Hún skoraði tvö mörk og átti stóran þátt í tveimur til viðbótar. Þá var hún óheppin að skora ekki úr víti, sem hún átti líka stóran þátt í að fá, en slóvenski markvörðurinn varði skot hennar.

„Þetta var bara ljómandi gott,“ sagði Harpa. „Ég er mjög stolt af mér og liðinu öllu. Þetta hefur verið frábær ferð fyrir okkur,“ bætti hún við en Ísland vann í síðustu viku 4-0 sigur á Makedóníu. Báðir leikir voru í undankeppni EM 2017.

Harpa er öllu jöfnu ekki vítaskytta Íslands en Margrét Lára Viðarsdóttir var farin af velli þegar það var dæmt. „Ég sé ekki eftir því að hafa tekið vítið. Alls ekki. Ég er mjög þakklát fyrir traustið sem mér var sýnt og ég mun bara nýta það næst.“

Íslenska liðið spilaði sem fyrr segir gríðarlega vel í kvöld og skapaði sér fjölmörg færi, þar sem Harpa var oftar en ekki stóru hlutverki.

„Það eru algjör forréttindi að spila í þessu liði. Það er gríðarlega vel spilandi og við erum að skapa hættur alls staðar á vellinum. Ég græði á því sem fremsti sóknarmaður og það er geðveikt taman að fá mörg tækifæri til að skora og leggja upp mörk.“

„Fyrirfram hefði maður ekki búist við því að vinna Slóveníu með stærri mun en Makedóníu. En við vorum bara miklu betri aðilinn í kvöld.“