Guðjón yfirgefur Breiðablik

Guðjón Pétur Lýðsson er á förum frá Breiðabliki en hann og knattspyrnudeild félagsins hafa ákveðið að nú skilji leiðir og leikmannasamningur Guðjóns verður ekki framlengdur. Þetta kemur fram í fréttatilkynningu frá Guðjóni og Breiðabliki.

Eins og fram kom í samtali við Vísi fyrr í vikunni var Guðjón ósáttur við hlutskipti sitt hjá Blikum í sumar. Hann spilaði þrátt fyrir það 20 af 22 deildarleikjum Breiðabliks, skoraði fjögur mörk og lagði upp sex til viðbótar. Breiðablik endaði í 2. sæti Pepsi-deildarinnar.

Guðjón lék í þrjú ár með Breiðabliki, alls 60 deildarleiki og skoraði í þeim 17 mörk. Auk Breiðabliks hefur Guðjón leikið með Haukum, Stjörnunni, Álftanesi og Val hér á landi. Þá lék hann um tíma með Helsingborg í Svíþjóð.

Í samtalinu við Vísi sagðist Guðjón stefna að því að leika erlendis á næsta tímabili: „Það hafa alltaf verið lið úti sem hafa sýnt manni áhuga en það er best að segja sem minnst um það á þessu stigi málsins. Þetta kemur bara í ljós. En ef ekkert verður af því þá heyrir maður í liðunum hér heima. Það er alveg ljóst að ef ég spila á Íslandi þá verður það með toppliði,“ sagði Guðjón.

Í fréttatilkynningunni þakkar hann knattspyrnudeild Breiðabliks, starfsfólki, sjálfboðaliðum, stuðningsmönnum, þjálfurum og síðast en ekki síst leikmönnum fyrir frábæra tíma hjá félaginu.