Trump í 60 mínútum: Leyfum Rússum að kljást við ISIS í Sýrlandi

Donald Trump vill að Bandaríkjastjórn breyti nálgun sinni þegar kemur að baráttunni gegn ISIS í Sýrlandi. Forsetaframbjóðandinn vill að Bandaríkin láti af afskiptum sínum og láti Rússum það frekar eftir að kljást við ISIS-liða í samstarfi við Sýrlandsstjórn.

Trump ræddi þessi mál og ýmislegt fleira í viðtali í fréttaskýringaþættinum 60 mínútur sem sýndur var á sjónvarpsstöðinni CBS í gærkvöldi.

Flestir frambjóðendur Repúblikana hafa talað fyrir aukinni hernaðarlegri þátttöku Bandaríkjanna í Sýrlandi, en Trump segist þó vilja fara aðra leið og draga úr þegar takmarkaðri þátttöku Bandaríkjahers í Sýrlandi.

Rússlandsstjórn og Bashar al-Assad Sýrlandsforseti eru bandamenn og hafa Rússar sent herlið til Sýrlands á síðustu vikum.

Trump sagði þó annað eiga við um Írak og segist reiðubúinn sem forseti að senda bandarískt herlið á vettvang til að stöðva vígasveitir ISIS.

Sjá má viðtalið við Trump í spilaranum að neðan.