Day og Bae taka forystuna fyrir lokahringinn á Barclays

PGA-meistarinn Jason Day og Suður-Kóreumaðurinn Sangmoon Bae leiða fyrir lokahringinn á Barclays meistaramótinu sem klárast í kvöld en þeir eru á 11 höggum undir pari eftir fyrstu þrjá hringina.

Þeir léku báðir frábært golf á þriðja hring og komu inn á 63 höggum eða sjö undir pari.

Bubba Watson er í þriðja sæti aðeins einu höggi á eftir þeim á tíu undir pari en Henrik Stenson og Zach Johnson koma þar á eftir á níu undir.

Barclays meistaramótið er það fyrsta í úrslitakeppni PGA-mótaraðarinnar, FedEx-bikarnum, en þar er spilað um gríðarlega háar fjárhæðir og því er pressan á þátttakendum meiri heldur en gengur og gerist.

Aðeins 100 efstu kylfingarnir á stigalista mótaraðarinnar fá þátttökurétt á Deutsche Bank meistaramótinu sem hefst í næstu viku og því verður eflaust leikið til þrautar í dag en bein útsending frá lokahringnum á Plainfield vellinum hefst klukkan 16:00 á Golfstöðinni.