Norðurá komin í 65 laxa

Veiðiárnar eru að komast í gang hver af annari og nú bíða menn spenntir eftir eins árs laxagöngunum.

Það er yfirleitt um miðjan júní sem fer að bera á eins árs laxi í ánum svo næstu daga gæti veiðin farið að taka nokkurn kipp í þeim ám sem eru þekktar fyrir stóra eins árs laxastofna, t.d. Norðurá. Staðan í Norðurá er undir meðalári eins og er en það sem hefur þó glatt veiðimenn á bakkanum er að laxinn sem er að veiðast er vænn. Að venju eru svæðin neðan við Laxfoss að gefa mest en þó má klárlega reikna með að laxinn fari í auknum mæli upp á efri svæðin þegar það er gott vatn í ánni.  Staðan í Norðurá í gær var sú að 65 laxar eru komnir á land og að sögn veiðimanna sem voru að koma úr ánni er nokkuð líf á helstu stöðum en það vantar þó ennþá, eins og við nefndum, sterkar göngur af smálaxi sem eiga eftir að ýta veiðitölum í ánni vel upp.