Blanda gaf fyrsta laxinn sinn klukkan hálf átta í morgun

Blanda opnaði ásamt Norðurá og Straumunum í morgun og þrátt fyrir heldur kalt veður er nokkuð líf í ánni.

Fyrsti laxinn kom á land í Blöndu klukkan hálf átta í morgun eða rétt korteri eftir að Norðurá gaf sinn fyrsta svo þetta er óskabyrjun í báðum ánum.  Fyrir utan þennan sem er þegar kominn á land í Blöndu er nokkuð líf, að sögn veiðimanna, á Breiðunni þar sem laxar eru að sýna sig svo áin á klárlega eftir að gefa meira þegar líður á daginn.  Það var Siggi Bjössi sem landaði fyrsta laxinum úr Blöndu þetta árið en hann fékk 79 sm hrygna sem tók Willie Gun á syðri bakkanum á Breiðunni.  Ekki hefur náðst í Sigga í síma enda er það ekkert skrítið því þegar maður stendur á bakkanum og kastar fyrir lax á opnunardegi er ekkert forgangsmál að svara símanum heldur einbeita sér að veiðinni.

Það er klárt mál að þessar góðu fréttir af opnunum beggja ánna gefa góða von að sumarið verði langt frá því sem það var í fyrra en raunverulega verður ekki hægt að sjá það fyrr en lengra líður inní tímabilið en við vonum að það stefni í gott veiðiár.  Íslenskir veiðimenn eiga það svo sannarlega inni.