Hólmfríður skoraði í bikarsigri Avaldsnes

Hólmfríður Magnúsdóttir var meðal markaskorara Avaldsnes-liðsins þegar liðið komst áfram í sextán úrslit norska bikarsins í kvöld.

Hólmfríður skoraði annað mark Avaldsnes í 5-0 sigri á C-deildarliðinu Hinna frá Stavanger en markið hennar kom í síðari hálfleik.

Þórunn Helga Jónsdóttir var líka í byrjunarliði Avaldsnes en íslensku konurnar voru báðar teknar af velli.

Hin mörk liðsins skoruðu þær Karina Sævik og Cecilie Pedersen sem gerðu báðar tvö mörk.

Katrín Ásbjörnsdóttir lék ekki með Klepp í 3-2 útisigri á Åsane Fotball Damer en María Þórisdóttir skoraði hinsvegar sigurmarkið sextán mínútum fyrir leikslok en stelpurnar hans Jóns Páls Pálmasonar lentu 1-0 og 2-1 undir í leiknum.

Guðbjörg Gunnarsdóttir var hvíld þegar Lilleström vann 6-0 útisigur á Lyn en Guðbjörg hefur haldið hreinu í fyrstu fimm leikjum liðsins í deildinni.

Gunnhildur Yrsa Jónsdóttir og félagar í Stabæk unnu 8-0 útisigur á Bossekop.