McIlroy og Spieth fara vel af stað á heimsmótinu

Heimsmótið í holukeppni, Cadillac World Golf Championship, hófst á TPC Harding Park vellinum í Kaliforníu í dag en 64 bestu kylfingar heims eru meðal þátttakenda í þessu stærsta holukeppnismóti ársins í golfheiminum.

Leikið er með nýju fyrirkomulagi í ár þar sem ekki er um að ræða útsláttarkeppni frá byrjun heldur 16 fjögurra manna riðlar þar sem sigurvegarinn í hverjum riðli kemst í 16 manna úrslit sem hefjast á laugardaginn.

Í fyrstu umferð voru nokkur óvænt úrslit en þar ber helst að nefna Henrik Stenson sem er í þriðja sæti á heimslistanum í golfi sem tapaði fyrir John Senden frá Ástralíu. Stenson tapaði í bráðabana á 19. holu en hann er yfirleitt mjög öflugur í holukeppni.

Þá tapaði Jason Day, sem er í sjöunda sæti á heimslistanum, fyrir Charley Hoffman 4/3 og ítalski kylfingurinn Francesco Molinari lagði fyrrum Masters meistarann Adam Scott að velli 5/4.

Augu flestra verða eflaust á Jordan Spieth og Rory McIlroy um helgina en þeir fóru létt með sína leiki í fyrstu umferð á móti Mikko Ilonen og Jason Dufner.

Tilþrif dagsins átti þó Bandaríkjamaðurinn Ben Martin en hann var jafn Matt Kuchar eftir 16 holur. Hann gerði sér þó lítið fyrir og fór holu í höggi á hinni löngu 17. holu sem dugði honum til sigurs en Kuchar gat ekki annað en brosað og óskað mótspilara sínum til hamingju með hreint út sagt frábært högg.

Heimsmótið í holukeppni verður í beinni útsendingu á Golfstöðinni alla helgina og hefst útsending á morgun klukkan 20:00.