Aníta með næstbesta tímann inn í undanúrslitin

Aníta Hinriksdóttir náði öðrum besta tímanum í undanrásum 800 metra hlaups kvenna á Evrópumótinu í frjálsum íþróttum innanhúss.

Aníta kom í mark á 2:01.56 mínútum og bætti bæði Íslandsmetið og Evrópumet unglinga sem hún átti sjálf síðan Aníta hljóp á 2:01,77 mínútum á Meistaramóti Íslands á dögunum.

Aníta leiddi allt hlaupið en missti hina rússnesku Yekaterina Poistogova fram úr sér í lokin. Sú rússneska var með besta tímann í undanrásunum en hún kom í mark á 2:01.44 mínútum.

Jenny Meadows, sem er sigurstranglegust í greininni á mótinu, vann sinn riðil örugglega á 2:02.59 mínútum en náði þó bara sjötta besta tímanum í undanrásunum.

Undanúrslitahlaupið fer fram klukkan 17.00 á morgun laugardag og þá verður fróðlegt að sjá hvernig Anítu gengur að fylgja eftir þessu frábæra hlaupi sínu í dag.