Reus hefði getað tvöfaldað launin sín

Marco Reus hefði getað tvöfaldað laun sín hjá einu af stærstu félögum Evrópu en valdi þess í stað að vera um kyrrt hjá Dortmund í Þýskalandi.

Þetta segir Hans-Joachim Watzke, stjórnarformaður Dortmund, í samtali við þýska fjölmiðla. Fullyrt er að Reus hafi verið undir smásjá liða eins og Bayern München, Real Madrid, Chelsea, Manchester United og Manchester City.

Reus skrifaði fyrr í vikunni undir nýjan samning við Dortmund sem gildir til 2019. Þrátt fyrir að félagið sé nú í fallsæti í þýsku úrvalsdeildinni með aðeins nítján stig að loknum 20 umferðum.

„Þetta er hálfgalin saga og í raun stórmerkileg. Hann hefði getað tvöfaldað launin sín hjá öðru félagi,“ sagði Watzke.

„En hann valdi að halda tryggð við Dortmund. Það hefði reynst mjög erfitt fyrir Marco að fara frá félaginu og flytja frá borginni. Það gerði útslagið að lokum.“

Reus sér fyrir sér að vera áfram hjá Dortmund þar til að ferlinum lýkur. „Þetta var mikilvæg ákvörðun fyrir mitt líf. Þess vegna tók þetta svo langan tíma,“ sagði Reus sem er uppalinn hjá Dortmund. Hann lék þó með Rot Weiss Ahlen í neðri deildunum á táningsárum sínum og svo Gladbach frá 2009 til 2012, er hann sneri aftur til Dortmund.

„Þegar ég kom aftur þá sagðist ég vera með ákveðnar áætlanir í huga fyrir mig og félagið. Ég stend við það sem ég sagði þá. Maður stendur við sitt í blíðu og stríðu.“