Dúi nýr formaður Skotvís

Dúi J. Landmark var á aðalfundi Skotveiðifélags Íslands (Skotvís) í gær kjörinn nýr formaður félagsins en þetta kemur fram í tilkynningu frá Skotvís.

Elvar Árni Lund, fyrrverandi formaður, gaf ekki kost á sér til endurkjörs eftir sjö ára stjórnarsetu, þar af fjögur ár sem formaður. 

Í nýrri stjórn sitja nú auk Dúa, Indriði R. Grétarsson sem kjörinn var í embætti varaformanns, Kristinn Gísli Guðmundsson, Stefán Þórarinsson, Aðalbjörn Sigurðsson, Friðrik Sigurður Einarsson og Borgar Antonsson.

Í tilkynningunni segir að nýrrar stjórnar bíði fjölmörg verkefni, meðal annars að halda áfram þeirri viðamiklu uppbyggingu á innviðum félagsins sem fráfarandi stjórn vann að síðustu ár.

Má þar nefna stofnun svæðisráða á landsvísu, ásamt því að vinna áfram að hagsmunamálum skotveiðimanna í samvinnu við stjórnvöld og önnur útivistar- og náttúruverndarasamtök. Einnig að vinna áfram að upplýsingagjöf til skotveiðimanna og almennings.