Alexis Tsipras, nýr forsætisráðherra Grikklands, hefur útilokað möguleikann að snúa sér til Rússlands til að biðja um aðstoð til að takast á við efnahagsvanda landsins. Viðræður við helstu lánadrottna – Evrópusambandið, Seðlabanka Evrópu og Alþjóðagjaldeyrissjóðinn – standa nú yfir.
„Við erum með skuldbindingar gagnvart þeim. Núna eru engar aðrar hugmyndir uppi,“ sagði Tsipras þegar hann ræddi við blaðamenn í fyrstu utanlandsheimsókn sinni sem forsætisráðherra. Samkvæmt hefð var förinni heitið til Nikósíu, höfuðborgar Kýpur.
Tsipras segist þó vilja sjá nýja aðila til að halda utan um stuðninginn við Grikkland. Embættismenn frá ESB, Seðlabanka Evrópu og AGS fylgjast nú með og taka út aðhaldsaðgerðir Grikklandsstjórnar.
Forsætisráðherrann ítrekaði jafnframt að grísk stjórnvöld sjái það ekki sem leið úr kreppunni að yfirgefa evrusvæðið.
Tsipras neitar að leita til Rússlands
Tengdar fréttir
Fullviss um að ná samningum um skuldir Grikklands
Forsætisráðherra Grikklands, Alexis Tsipras, segir að gríska ríkið muni borga skuldir sínar.
Tsipras vill fara samningaleiðina
Alexis Tsipras boðar miklar breytingar í Grikklandi, uppstokkun í kerfinu og sanngjarna samninga við lánardrottna. Hann segist samt vilja forðast átök við Evrópusambandið og Alþjóðagjaldeyrissjóðinn.
Kosningarnar í Grikklandi: ESB og Þjóðverjar líti í eigin barm
Eiríkur Bergmann Einarsson segir ESB nú þurfa að mæta þeirri staðreynd að eitt af aðildarríkjum hafi slitið sig frá því samkomulagi sem lagt var upp með að bjarga fjármálakerfi álfunnar.
