Róbert: Við áttum aldrei möguleika

Línumaðurinn Róbert Gunnarsson fann sig ekki frekar en flestir aðrir leikmenn íslenska liðsins gegn Dönum í kvöld.

„Við áttum aldrei möguleika, því miður. Þetta fór ekki eins og við ætluðum okkur. Við vorum vel undirbúnir en þeir voru einfaldlega mun betri en við í dag," sagði Róbert afar svekktur.

„Ef við spilum svona þá erum við örugglega ekki að spila af okkar getu."

Mótið hjá Íslandi eru nokkur vonbrigði heilt yfir. Liðið skreið inn í 16-liða úrslitin og tapaði svo sannfærandi í kvöld.

„Þetta er búið að vera mjög kaflaskipt. Við höfum átt góða og slæma leiki. Við erum yfirleitt sjálfum okkur verstir og það var þannig í þessu móti.

„Ég vona að framtíð landsliðsins sé björt. Við sjáum hvað setur og hvernig framhaldið verður. Ég veit ekkert um það. Við vorum bara að klára leikinn."