Sverre byrjar að æfa eftir áramót

Sverre Andreas Jakobsson var ekki á æfingu íslenska landsliðsins í gær en þá hófst formlegur undirbúningur þess fyrir HM í Katar.

„Sverre þurfti að klára ákveðin mál í sinni vinnu á Akureyri og hann kemur svo til okkar eftir áramót,“ segir Aron Kristjánsson landsliðsþjálfari, en um tíma var óvíst hvort Sverre gæti komist frá sínum skuldbindingum á Akureyri til að spila með Íslandi á HM í Katar.

„Hann getur farið með okkur út og ég á ekki von á öðru en að hann verði með okkur af fullum krafti,“ sagði Aron og bætti við að ástand leikmannahópsins væri gott.

„Við tókum hlaupapróf í morgun og ég er ánægður með útkomuna úr því. Það er lítið um meiðsli og vonandi verður það þannig áfram svo við getum stillt upp okkar sterkasta liði.“