Tók þessari áskorun fagnandi

Jón Ragnar Jónsson er höfundur Þjóðhátíðarlagsins í ár. Lagið þykir einstaklega grípandi og Jón hefur fengið mjög góð viðbrögð við því.

Þegar Jón var beðinn um að semja Þjóðhátíðarlagið fyrir árið 2014 síðastliðið haust var það auðsótt af hans hálfu. „Ég þurfti ekki að hugsa mig tvisvar um. Þarna var gamall draumur að rætast. Ég hef oft farið á Þjóðhátíð og upplifað stemninguna. Ég tók þessari áskorun því fagnandi,“ sagði Jón þegar blaðamaður náði tali af honum í Hvíta-Rússlandi þar sem hann var á ferð með knattspyrnumönnum FH vegna Evrópuleiks.

Jón segist hafa farið fyrst á Þjóðhátíð árið 2003 og nokkrum sinnum síðan. Bæði 2011 og 2012 kom hann fram á hátíðinni. „Ég þekki algjörlega stemninguna og þegar kom að því að semja texta var ég ekkert að finna upp hjólið. Frekar að setja á blað hina týpísku stemningu sem allir þekkja sem hafa verið á Þjóðhátíð. Síðan þurfti ég að huga að því að lag og texti væru þannig að allir gætu sungið með,“ segir Jón sem hefur fengið mjög góð viðbrögð við laginu, jafnt frá Eyjamönnum sem öðrum.

Á föstudagskvöldið á Þjóðhátíð kemur Jón fram og frumflytur lagið fyrir gesti ásamt hljómsveit sinni. „Hljómsveitin klæðir lagið í fullan skrúða. Það væri ekkert varið í þetta ef ég væri einn með kassagítarinn. Ég er farinn að hlakka mikið til, enda veit ég að þetta verður sérstök stemning.“

Ljúft að vera til

Í Herjólfsdalnum, við lífsins njótum.

Það er svo ljúft að vera til.

Vináttuörvum allt í kring skjótum.

Samveran veitir birtu og yl.

Hér er hamingja, ást og gleði.

Stemmingin í dalnum er svo blíð.

Forréttindi að vera með í,

veisluhöldunum á Þjóðhátíð.

Eyja meyja og peyja, lof mér að segja,

ó, hve ljúft það er að vera til.

Eyja meyja og peyja, lof mér að segja,

ó, hve ljúft það er að vera til.

Í bleikri brekkunni við syngjum saman.

Svo ljúft að vera þér við hlið.

Í þínum örmum svo hlýtt, svo gaman.

Vor bjarta framtíð blasir við.

Hér er hamingja, ást og gleði.

Stemmingin í dalnum er svo blíð.

Forréttindi að vera með í,

veisluhöldunum á Þjóðhátíð.

Eyja meyja og peyja, lof mér að segja,

ó, hve ljúft það er að vera til.

Eyja meyja og peyja,

lof mér að segja,

ó, hve ljúft það er

að vera til.