Þórsarar geta náð fjórða sætinu af Njarðvík

Fimm leikir fara fram í Dominos-deild karla í körfubolta í kvöld og hefjast þeir allir klukkan 19.15.

Stórleikur kvöldsins er í Ljónagryfjunni þar sem Njarðvík og Þór úr Þorlákshöfn mætast. Þór getur náð fjórða sætinu af Njarðvík með því að vinna með meira en fimm stigum en Njarðvík vann fyrri leikinn í Þorlákshöfn eftir tvær framlengingar.

ÍR-ingar fá verðugt verkefni þegar þeir fá sjóðheita Grindvíkinga í heimsókn alveg eins og Stjörnumenn sem glíma við topplið KR-inga í Garðabænum.

Snæfell (8. sæti) og Haukar (7. sæti) mætast í Stykkishólmi og þurfa bæði á sigri að halda í baráttunni um sæti í úrslitakeppninni.

Lokaleikur kvöldsins er svo þegar Keflvíkingar fá Valsmenn í heimsókn.