Sex rétta jólaævintýri fyrir 4900 krónur

Veitingahúsið Kopar er á fallegum stað við hafnarbakkann á Geirsgötu. Þar ræður ríkjum Ylfa Helgadóttir landsliðskokkur. Hún býður upp á sannkallað jólaævintýri í hádeginu og á kvöldin til áramóta.

Kopar sérhæfir sig í fiskréttum og jólaævintýrið ber keim af því. „Ég vil sérstaklega mæla með hádegis jólaævintýrinu okkar. Í boði er sex rétta veisla fyrir aðeins 4900 krónur. Í forrétt eru djúpsteiktar gellur í orly-deigi, grilluð grafin önd með confit andalæri með döðlusósu og íslensk hörpuskel úr Breiðafirði með dillkremi og salati. Í aðalrétt er boðið upp á blálöngu úr Atlantshafinu með humar- og kampavínsósu og síðan karfi með hnetusmjörsósu og mangó. Loks er Daim-ostakaka í eftirrétt,“ segir Ylfa og bætir því við að þetta sé styttri útgáfa af kvöldseðlinum.

„Við bjóðum þessa ódýru veislu í hádeginu alla daga nema sunnudaga frá kl. 11.30 - 14. Við leggjum mikla áherslu á að hráefnið sé ferskt og gott en við eigum marga fastagesti. Í hádeginu er til dæmis alltaf fiskréttur dagsins sem er mjög vinsæll,“ segir Ylfa sem er nýkomin heim frá Lúxemborg þar sem Íslenska kokkalandsliðið náði 5. sæti á Heimsmeistaramóti. Í fyrri hluta keppninnar fékk liðið gullverðlaun fyrir heita rétti. Þetta er besti árangur sem Ísland hefur náð í þessari keppni. „Við erum varla komin niður á jörðina eftir þessa upplifun,“ segir meistarakokkurinn.

Nú er í boði að kaupa gjafabréf á Kopar með 15% afslætti til 20. desember. Hægt er að velja um að kaupa bréf fyrir ákveðna upphæð eða gjafabréf á ævintýraferð sem er smakkseðill með eða án víns.

„Gjafabréf frá okkur er ævintýraleg gjöf, enda bjóðum við upp á yndislegt útsýni á frábærum stað. Við erum í gömlu verbúðunum, grænu húsunum við höfnina. Staðurinn verður tveggja ára í maí á næsta ári og þá verður örugglega haldið upp á það með góðu partíi. Mottóið mitt er að ef tilefni gefst til samveru skal nýta það.“ 

Hægt er að skoða matseðil Kopar á heimasíðunni koparrestaurant.is og fylgjast með tilboðum og fleiru á Facebook-síðu staðarins.