Falleg skinn í flottu umhverfi

Feldur er í eigu hjónanna Heiðars Sigurðssonar, feldskera, og Kristínar Birgisdóttur og er fyrirtækið nýflutt á Snorrabraut 56. „Við fluttum inn í sumar og fengum með okkur þau Leif Welding, hönnuð, og Brynhildi Guðlaugsdóttur, arkitekt, til að innrétta allt hér og erum við mjög ánægð með útkomuna,“ segir Kristín. „Við höfum leitast við að hafa hér hlýlegt andrúmsloft og notum náttúruleg efni í innréttingar sem henta vel við það sem við höfum að bjóða. Við erum með gott úrval af fallegri vöru, jökkum, mokkakápum, pelsum og vestum og einnig ýmsa vinsæla smávöru svo sem húfur, kraga og hanska. Við tökum einnig að okkur að sérsauma kraga og geta viðskiptavinir okkar valið sér refaskinn að eigin ósk.“

Myndirnar úr búðinni sem Ernir Eyjólfsson, ljósmyndari Vísis, tók og sjá má hér að ofan tala sínu máli. 

Heiðar er menntaður feldskeri og býður hann upp á viðgerða- og breytingaþjónustu. Einnig er allt viðhald á vörum frá Feldi Verkstæði innifalið í kaupum. „Æskilegt er að dýrari flíkurnar, pelsar og mokkakápur, séu í þjónustu fagmanns svo hægt sé að breyta þeim og bæta. Við leggjum mikið upp úr allri þjónustu hjá okkur,“ segir Heiðar.

Hjá Feldi má einnig fá fallega leðurhanska sem hægt er að hafa á sér á meðan snjalltæki eru notuð en flesta hanska þarf að taka af höndum til að stjórna skjánum. "Það er ákveðin áferð í leðrinu sjálfu, í öllum tíu fingrum hanskans sem gerir það að verkum að hægt er að vera í þeim þegar snjalltæki eru notuð. Þessi áferð er á öllum nýjustu leðurhönskunum frá Feldi." Leðurhanskana frá Feldi og virkni þeirra má sjá hér.