Frumvarp komið fram: Reykjavíkurflugvöll undir hatt ríkisins

Fimmtán þingmenn Framsóknarflokksins hafa lagt fram frumvarp þess efnis að skipulagsvald yfir Reykjavíkurflugvelli færist frá Reykjavíkurborg til ríkisins. Ráðherrar Framsóknarflokksins eru ekki á meðal flutningsmanna.

Í frumvarpinu segir að flutningsmenn telji nauðsynlegt að standa vörð um það fjölþætta og þýðingarmikla hlutverk sem Reykjavíkurflugvöllur hefur með því að festa staðsetningu hans í sessi á tryggan hátt til hagsbóta fyrir landsmenn alla.

Lagt er til að Reykjavíkurflugvöllur verði skýrt afmarkaður og þar fari ráðherra með yfirstjórn skipulags- og mannvirkjamála. Gerð aðal- og deiliskipulags verði hins vegar í höndum skipulags- og byggingarnefndar Reykjavíkurflugvallar, eftir atvikum í samstarfi við skipulags fulltrúa Reykjavíkurborgar.

Höskuldur Þórhallsson, sem er fyrsti flutningsmaður frumvarpsins, lagði fram sambærilegt frumvarp á Alþingi á síðasta ári. Dagur B. Eggertsson, borgarstjóri og fyrrum formaður borgarráðs, sagði þá í samtali við Stöð 2 að hugmynd hans væri pólitískt útspil. Höskuldur væri einungis að stökkva á vinsældarvagn. Það frumvarp lagði Höskuldur fram einn en hefur nú alla þingmenn Framsóknar á bak við sig.

Hátt í sjötíu þúsund hafa ritað nafn sitt á lista þar sem skorað er á Reykjavíkurborg og Alþingi að „tryggja öllum landsmönnum óskerta flugstarfsemi í Vatnsmýri til framtíðar.“