Ekki mikil veiði fyrstu tvo dagana á rjúpnaslóðum

Rjúpnaveiðar hófust á föstudaginn og það viðraði heilt yfir ágætlega í flestum landshlutum og mikið fjölmenni var á vinsælum veiðistöðum.

Fyrstu fréttir af veiðum eru heldur litlar þrátt fyrir að fjölmenni hafi gengið til rjúpna en margir komu fugllausir til byggða á fyrsta degi.  Þeir sem mest fengu voru að fá 10-15 fugla yfir daginn og komnir með í jólamatinn og vel það en annars voru margir að fá 2-4 fugla eftir dagsgöngu.  Veiðimenn sem gengu til fjalla á vesturlandi og suðurlandi hafa flestir haft orð á því að mikið hafi verið um tófuspor en lítið sést til rjúpna.  Þær sem sáust voru skotnar en einhverjar sloppið eins og alltaf.  Á Skagaheiði var lítil sem engin veiði hjá þeim veiðimönnum sem við höfum heyrt frá og en sem helst gerði veiðimönnum erfitt fyrir var mikill snjór en svona mikið snjómagn hefur ekki sést í opnun á þessum slóðum í líklega áratug eða meira.  Til að bæta gráu ofan á svart var snjórinn blautur en það virðist rjúpan þola illa og fer þá ofar í þurrann snjó eða í kletta þar sem hún getur setið á þurru.  Fréttir af veiðislóðum í morgun eru heldur litlar aðrar en að mikið af veiðimönnum séu t.d. í Bröttubrekku, Holtavörðuheiði, við Laugavatn, Fagradal og við Hítarvatn en fáir hvellir sem gefa einhverja veiði til kynna.