37 punda risalax úr ánni Dee

Áin Dee í Skotlandi er ein af þessum ám sem marga veiðimenn dreymir um að veiða enda er saga stangveiða í ánni mjög gömul og hefðin rík.

Það er nokkur hópur Íslendinga sem hefur veitt í ánni með liðsinni Lax-Á sem meðal annars selur ferðir í ánna.  Umhverfið við ánna er mjög fallegt og á stærstum kafla gróið og umlukið misþéttu skóglendi sem gerir þetta klárlega að annari veiðiupplifun en að veiða á Íslandi.  Síðasta miðvikudag veiddist svo lax í ánni sem er stærsti laxinn úr henni í sumar og líklega nokkrum árum betur en hann var vigtaður 37 pund í viðurvist leiðsögumanna við ánna sem staðfestu stærð hans en líklegt er að hann hafi veirð nær 40 pundum þegar hann gekk í ánna.  Nokkrir svona drekar, eða í það minnsta áætlaðir nálægt þessari stærð, hafa sést í ánum hér heima í sumar og flestir þeirra í Laxá í Aðaldal en stórlöxum yfir 100 cm fjölgar þar á hverju ári og eftirspurn eftir veiðileyfum á svæðum þar sem von á stórlaxi er há er mjög mikil.  Þessu þakka veiðimenn þá helst aukningu á veitt og sleppt á laxi í ánum.