Lokatalan úr Laxá á Ásum 1006 laxar

Núna loka laxveiðiárnar hver af annari en veiði lýkur þó ekki fyrr en í október í þeim ám sem byggja veiðar sínar á seiðasleppingum.

Það verður þess vegna bið á að fá lokatölur úr sumrinu og geta séð heilt yfir hvernig má dæma þetta sumar.  Það er þó ljóst eins og oft hefur komið fram að árnar á vesturlandi hafi margar hverjar átt sín verstu ár og líklegt að nokkuð þyngra verði að selja leyfi í þær fyrir næsta sumar.  Árnar í Húnavatnssýslu hafa allar sloppið vel við veiðileysuna í sumar en Víðidalsá og Vatnsdalsá hafa þó átt betri ár en veiðin í þeim engu að síður alls ekki slæm.  Blanda átti gott sumar með 1903 laxa og Laxá á Ásum áttu frábært sumar en í henni veiddust 1006 laxar á aðeins tvær stangir sem gerir hana að aflahæstu ánni sé miðað dagsveiði á stöng en það gera 503 laxa á stöng í sumar.  Til samanburðar væri sú eina stöng með nálægt heildar sumarveiði Laxár í Kjós, Langár eða Grímsár en í þeim ám er veitt á 10-12 stangir.  Það hefur þess vegna verið mikið fjör á bökkum Laxár á Ásum og það sem einnig hefur glatt veiðimenn er mikið af vænum tveggja ára laxi ásamt því að nokkrir laxar sem lágu um og yfir meterinn komu á land.  Þess má geta að Laxá á Ásum er uppseld fyrir næsta sumar.