Lennon: Hewson reyndi að slá mig til baka í meidda typpið

Skondið atvik átti sér stað í leik Vals og FH í Pepsi-deild karla í knattspyrnu í gær sem FH-ingar unnu örugglega, 4-1.

Þegar Sam Hewson, enski miðjumaðurinn í liði FH, fékk óþarfa gult spjald á 90. mínútu sló skoski sóknarmaðurinn StevenLennon hann í hnakkann.

„Við erum góðir félagar og erum alltaf að grínast í hvor öðrum. Ég hélt hann væri að fara í leikbann og því sló ég hann. Síðan kom í ljós að hann var ekkert að fara í bann,“ segir Lennon léttur í samtali við vísi.

Þó Hewson og Lennon séu góðir vinir var Englendingnum ekkert skemmt og brást hann illur við.

„Þetta var nú frekar fast hjá mér,“ segir Lennon og hlær við. „Hann reyndi að slá mig til baka í typpið sem ég er meiddur í. Hann var ekki kátur þarna í nokkrar sekúndur, en sem betur fer hitti hann mig ekki.“

Reiðin stóð ekki lengi yfir og voru vinirnir aftur byrjaðir að grínast saman eftir leik. Hewson og Lennon þekkjast vel, en þeir komu saman til landsins seinni hluta tímabilsins 2011 þegar þeir gengu í raðir Fram.

„Við erum bestu vinir og bjuggum meira að segja saman þegar við vorum í Fram. Nú búum við báðir einir, en við erum mikið saman. Við förum mikið í ræktina saman til dæmis,“ segir Lennon.

Skotinn kveðst eðlilega spenntur fyrir úrslitaleiknum gegn Stjörnunni á laugardaginn sem fram fer klukkan 16.00 í Kaplakrika.

„Þetta verður löng vika, en leikurinn verður frábær. Er ekki búist við allt að fimm þúsund manns á leikinn? Vonandi verður líka gott veður, þá verður dagurinn fullkominn,“ segir Skotinn.

Ótrúlegur Atli

Lennon skoraði eitt mark í gær eftir undirbúning Atla Guðnasonar sem hélt upp á þrítugsafmæli sitt með þrennu. Atli átti stórleik og fékk tíu fyrir sína frammistöðu á Vísi, sá fyrsti sem fær þá einkunn í sumar.

„Atli er algjörlega frábær. Hann er svo snjall spilari. Það er alveg ótrúlegt að hann hafi aldrei farið í atvinnumennsku. Ég áttaði mig ekki á því hversu góður hann er fyrr en ég byrjaði að spila með honum. Þegar hann er fyrir aftan mig fæ ég alltaf færi til að skora,“ segir Lennon.

Atli var ekki að þenja sig í viðtölum eftir leikinn frekar en fyrri daginn og Lennon segir hann jafnhógværan inn í klefa.

„Hann er svo hæglátur og góður gaur. Hann missir sig aldrei í neitt egó þó hann skori þrennu. Þessi frammistaða hans í gær var sú besta sem ég hef séð á Íslandi og það í svona mikilvægum leik,“ segir Steven Lennon.