Bubbi með 103 sm lax af Nessvæðinu

Nessvæðið dregur margan veiðimanninn að bökkum Laxár í Aðaldal og það er ekki laust við að margir festi við það tilfinningabönd sem seint verða slitin.

Það er óhætt að segja að einn af þeim sem hafa fest ástfóstur sitt við svæðið er Bubbi Morthens en hann hefur ötullega sent inn myndir á Facebook af þeim stórlöxum sem hann landar þar og margan hildarleikinn hefur hann átt við laxa sem hafa sloppið aftur í djúpið.  Í sumar hefur hann þó náð þremur löxum yfir 100 sm af svæðinu og er það árangur sem margur veiðimaðurinn getur hugsað sér að upplifa.  Í gærkvöldi náði Bubbi 103 sm laxi úr Kirkjuhólmakvísl sem vó 10.5 kg en við höfum því miður ekki upplýsingar um hvaða flugu hann tók en ekki náðist í Bubba áður en þessi frétt var birt.  Eins og sést á myndinni fer vel á með þessum tveimur höfðingjum en stórlaxinn fékk að sjálfsögðu að renna sér aftur í hylinn eftir átök við kónginn á bakkanum.