Skjálftar í Bárðarbungu kerfisbundið vanmetnir

Kristján Már Unnarsson skrifar 22. ágúst 2014 12:30

Kristín Vogfjörð, jarðskjálftafræðingur og rannsóknarstjóri Veðurstofu Íslands. Stöð 2/Baldur Hrafnkell.

Veðurstofan vanmat stærð jarðskjálfta fyrstu dagana í skjálftahrinunni í Bárðarbungu. Þetta var leiðrétt í gær og er nú ljóst að hrinan er enn öflugri en áður var talið.

„Við vorum í raun að vanmeta stærðir eða glugginn sem við skoðuðum þá í var of stuttu,“ segir Kristín Vogfjörð, jarðskjálftafræðingur og rannsóknarstjóri Veðurstofu Íslands, í samtali við fréttastofu 365.

„Orkan sem skjálftarnir voru að senda út var ekki í þessum glugga sem við vorum að nota. Þegar við fórum að skoða þetta betur þá stækkuðu þeir. Það virkar því eins og þeir hafi skyndilega stækkað en í raun og veru hafa skjálftar undanfarna daga verið aðeins vanmetnir.“

Mörgum brá undir hádegi í gær þegar sást á vef Veðurstofunnar að skjálftum af stærðinni milli þrjú og fjögur stig fór skyndilega að fjölga en áður höfðu stærstu skjálftarnir yfirleitt verið á bilinu tvö til þrjú stig.

Ástæða er ekki sú að aukinn kraftur væri að færast í hrinuna heldur var verið að leiðrétta mælakerfið.

Þess er skemmst að minnast að sterkasti skjálftinn í byrjun vikunnar var fyrst sagður 3,8 stig aðfararnótt mánudag. Þegar búið var að endurmeta stærðina hálfum sólarhring síðar var hann sagður vera 4,5 stig.

Bárðarbunga

Tengdar fréttir

Verður fimm stiga skjálfti rásmerki Bárðarbungu?

Kröftugur jarðskjálfti í Bárðarbungu um 5 á Richter var það sem hleypti af Gjálpargosinu í Vatnajökli árð 1996.

17. ágúst 2014 12:30

Skjálftinn var 4,5 stig

Sérfræðingar Veðurstofunnar hafa endurmetið stærð stóra skjálftans sem varð í Bárðarbungu í nótt.

18. ágúst 2014 21:45

Stærsti skjálftinn til þessa

Jarðskjálfti upp á að minnsta kosti 3,8 stig varð í grennd við Kistufell í norð-vestanverðum Vatnajökli í nótt og er þetta sterkasti skjálftinn sem mælst hefur í hrinunni, sem hófst um helgina. Hann fannst meðal annars á Akureyri.

18. ágúst 2014 06:57

Ekkert lát á skjálftavirkni - sá stærsti tæp fjögur stig

Ekkert lát er á skjálftavirkni í norðanverðum Vatnajökli, þar sem á þriðja hundrað skjálfta mældust í nótt, þar af tveir upp á þrjú stig eða meira. Sá fyrri reið yfir klukkan hálf tólf í gærkvöldi og mældist hann 3,8 stig. Sá síðari kom klukkan kortér yfir tvö og mældist 3,0 stig. Álíka stór skjálfti varð þar síðdegis í gær. Enn sjást þó engar vísbendingar um að kvikan sé að leita upp á yfirborðið en hún leitar áfram lárétt eftir berggöngum til norðausturs.

21. ágúst 2014 07:01