Stefán leitaði til ríkissaksóknara

Stefán Eiríksson, fráfarandi lögreglustjóri á höfuðborgarsvæðinu, hafði samband við ríkissaksóknara þar sem fyrirspurnir ráðherra hafi verið á þann veg að hann þurfti að afla upplýsinga um rannsóknina á lekamálinu. Þetta kemur fram í þriðja bréfi umboðsmanns Alþingis til innanríkisráðherra.

Stefán segist ekki muna eftir tilefni fundar síns með Hönnu Birnu Kristjánsdóttur innanríkisráðherra þann 18. mars.

„Þetta mál hefur án efa borið þar á góma með einhverjum hætti. Síðan koma í kjölfarið, þetta er í mars, í apríl, maí ... einhver fleiri símtöl. Ég man ekki hvað þau voru mörg, eitt, tvö, þrjú, ýmist þannig að hún hringir í mig beint eða ég fæ sms með orðunum „Getur þú hringt“?“ hefur umboðsmaður eftir Stefáni í bréfi sínu til ráðherra.

Stefán hafi þá hringt til baka í Hönnu Birnu og svarað ýmsum spurningum hennar. Einhverju sinni hafi verið gerð athugasemd við það þegar lögreglumenn mættu í ráðuneytið án þess að gera boð á undan sér. Þá hafi ráðherra verið mjög ósátt við framgöngu lögreglu og rannsóknir í tengslum við dóm Hæstaréttar í málinu er varðaði blaðamann Mbl.is.

„Í einu af þeim samtölum þá er hún mjög ósátt við framgöngu lögreglu og rannsóknir og annað í þeim dúr, og ég bara við því, en hringir svo í mig aftur og óskar eftir að fá að hitta mig bara svona í þeim tilgangi - það var þá á laugardegi sem hún bað mig um að koma og hitta sig ... til þess að undirstrika það að hún sé ekki að reyna að hafa nein áhrif á rannsókn málsins eða annað heldur sé bara að leita eftir svörum við spurningum,“ er haft eftir Stefáni.

Hann telur Hönnu Birnu hafa upplifað það þannig að hún væri að fara yfir strikið a.m.k. faglega og líklega í persónulegum samskiptum og viljað hreinsa andrúmsloftið. Fundurinn hafi líklega varað í klukkustund þar sem hann hafi í raun svarað sömu spurningum og áður.

Stefán segist í kjölfarið hafa velt fyrir sér hvað hann ætti að gera vegna allra þessara spurninga. Sumar hafi verið þess eðlis að hann hafi þurft að afla upplýsinga um rannsóknina.

„Þess vegna hafi hann haft samband við ríkissaksóknara og gert honum grein fyrir því að hann hefði fengið „símtöl frá ráðherra þar sem hún var að gera athugasemdir við ýmsa þætti í rannsókninni og spyrja margvíslegra spurninga og teldi að rannsóknin væri og ítarleg og óskaði eftir upplýsingum um meðferð trúnaðargagna og annað í þeim dúr og líka það, og ég kom því á framfæri við ríkissaksóknara að hún hefði sagt í þessu samtali við mig að þegar þessu máli yrði lokið þá væri það alveg ljóst í hennar huga að það þyrfti að rannsaka rannsókn lögreglu og ríkissaksóknara.“

Aðspurður um hvert tilefni þeirrar rannsóknar væri segir Stefán aðspurður af umboðsmanni:

„Ja, þessar athugasemdir hennar um að allt of langt væri gengið og verið að afla alls kyns gagna og setja fram með einhverjum sérkennilegum hætti ýmsa hluti og annað í þeim dúr. Ekki síst út af þessari athugasemd þá hafði ég samband við ríkissaksóknara.“