Hvaða þrjá tekur Tom Watson með til Skotlands?

Ryder-bikarinn í golfi fer fram á Gleneagles-vellinum í Skotlandi í lok september og styttist nú í að leikmannahópar Bandaríkjanna og Evrópu verði klárir.

Það er fyrir löngu ljóst hvaða níu kylfingar komast í bandaríska liðið samkvæmt stigalistanum, en TomWatson, fyrirliði Bandaríkjanna í ár, á enn eftir að velja þá þrjá síðustu með fyrirliðavalréttinum.

Hann tilkynnir endanlega hóp á þriðjudaginn og er Deutsche Bank-meistaramótið sem hefst í dag því síðasta tækifærið til að sýna sig fyrir þá kylfinga sem standa á barmi þess að komast í liðið.

Hunter Mahan, sem vann Barclays-mótið um síðustu helgi, þykir nú mjög líklegur til að vera einn af þeim þremur sem Watson velur, en hann var ekki inn í myndinni hjá flestum golfsérfræðingum fyrir síðustu helgi.

Á vefsíðu PGA-mótaraðarinnar eru fimm sérfræðingar fengnir til að spá hvaða þrjá kylfinga Watson mun velja og hvaða tveir aðrir eru inn í myndinni.

Allir fimm eru sammála um að Hunter Mahan og KeeganBradley verði valdir, þrír bæta svo við BrandtSnedeker, en einn vill meina að WebbSimpson fái tækifærið og annar að BrendonTodd verði í tólf manna hópnum.

Þeir sem eru öruggir í bandaríska liðið eru: Bubba Watson, RickieFowler, JimFuryk, Jimmy Walker, Phil Mickelson, MattKuchar, JordanSpieth, PatrickReed og ZachJohnson.

Hverjir sem verða valdir eiga erfitt verkefni fyrir höndum því Evrópa hefur drottnað yfir Ryder-bikarnum undanfarna tvo áratugi.

Evrópa er búin að vinna síðustu tvo Ryder-bikara og sjö af síðustu níu frá árinu 1995. Fyrir tveimur árum var bandaríska liðið með örugga forystu fyrir lokadaginn, en tapaði á ótrúlegan hátt í einu eftirminnilegasta móti síðari ára.

Útsending frá fyrsta degiDeutsche Bank-meistaramótsins í FedEx-bikarnum hefst á golfstöðinni klukkan 18.30.