Alonso: Ekkert öðruvísi að vinna með Kimi

Fernando Alonso segir að það sé ekkert öðruvísi að vinna með Kimi Raikkonen en öðrum liðsfélögum sem hann hefur haft í gegnum tíðina.

Raikkonen kom til Ferrari fyrir yfirstandandi tímabil, frá Lotus og hitt þar fyrir Alonso sem hefur ekið fyrir ítalska liðið síðan 2010. Ferrari ákvað að semja ekki afur við Felipe Massa og úr varð eina liðið með tvo fyrrum heimsmeistara í sínum röðum.

Raikkonen hefur þó ekki náð að sýna sínar bestu hliðar á tímabilinu. Ferrari bíllinn er ekki sá besti á brautinni og Raikkonen virðist á stundum eiga mjög erfitt með bílinn.

„Ég hef enga skoðun á því,“ sagði Alonso þegar hann var spurður um ástæður þess að honum hefur gengið talsvert betur en Raikkonen á tímabilinu.

„Bíllinn er augljóslega ekki frábær og okkur skortir niðurtog og grip. Við glímdum við bremsuvandamál í fyrstu tvemur keppnunum þar sem bremsukerfin í bílunum virkuðu ekki vel. Honum leið kannski bara ekki vel í bílnum og hugsanlega var jafnvægið í bílnum að trufla hann,“ sagði Alonso um liðsfélaga sinn.

Alonso segist vinna mikið með Raikkonen í átt að lausn á vandamálunum sem liðið stendur frammi fyrir með bílinn.

„Við vinnum mikið saman og fundir okkar á milli eru oft býsna langir því það þarf að ræða margt eftir keppnir. Við höfum stöðugt verið að koma með uppástungur og athugasemdir um hvernig bíllinn hegðar sér á brautinni og við reynum að aðstoða verkfræðinga liðsins eftir fremsta megni,“ hélt spænski ökuþórinn áfram.

Alonso segir að núverandi fyrirkomulag sé ekki ósvipað því sem var haft þegar Massa var liðsfélagi hans. Alonso leiðist sennilega ekkert að vera í fjórða sæti í heimsmeistarakeppni ökumanna á meðan Raikkonen er í því tólfta, í sambærilegum bíl.