48 laxar veiddust fyrir hádegi í Ytri Rangá

Það er alveg óhætt að segja að það sé kominn góður kippur í veiðina í Ytri Rangá og það sést auðvitað best á hækkandi veiðitölum.

Á morgunvaktinni í dag komu 48 laxar á land og var mikið líf á öllum svæðum enda virðast göngurnar loksins vera farnar að skila sér af fullum krafti í ánna.  Hækkandi hlutfall smálaxa er einnig mikið ánægjuefni sem sýnir að sá stofn sem alin er upp í ánni virðist ekki hafa lent í sambærilegum afföllum og laxinn á vesturlandi svo dæmi séu tekin.  Það hefur ekki verið full nýting á stöngunum svo heildarveiði á stöng er mun betri en ætla mætti og sumar stangir veiða meira en aðrar eins og gerist og gengur.  Hópurinn sem er við veiðar núna hættir á hádegi á morgun en forsvarsmaður hópsins tekur þá á móti næsta hóp og verður áin þess vegna hvíld að þeirra frumkvæði eftir hádegi svo veiðitölur dagsins á morgun verða ekki nema helmingur af því sem þær gætu orðið.