Eystri Rangá með flesta veidda laxa í vikunni

Blanda er ennþá á toppnum yfir fjölda veidda laxa en það er ljóst að það líklega strax í næstu viku verður Eystri Rangá komin á toppinn.

Það er vaxandi veiði í ánni og framundan besti tíminn þar sem sumir dagar geta hæglega gefið um 100 laxa.  Liðin vika gaf 429 laxa í Eystri Rangá og 309 laxar veiddust í þeirra Ytri en sú síðarnefnda er loksins komin í fullann gang enda hafa göngur aukist mikið í hana síðustu daga.  Morgunvaktin í gær gaf 28 laxa í Eystri en eitthvað minna veiddist á síðdegisvaktinni en ekki var það fiskleysi um að kenna.  19 stiga hiti og sól bakaði veiðimenn við bakkann og takann datt alveg niður á flestum stöðum.  Hofteigsbreiða gaf þó slatta af lax og voru nokkrir af þeim 80-90 sm.  Svisslendingar sem luku veiðum í gær veiddu mjög vel í ánni og fengu allt að 12 laxa í sumum hyljum á einni og sömu vaktinni.  Það er uppselt í ánna í ágúst en lausar stangir eru þegar farnar að seljast í haustveiðina.