Enginn Þjóðhátíðarblús hjá Eyjakonum - burstuðu Þór/KA

Kvennalið ÍBV vann óvæntan 5-0 stórsigur á Þór/KA í 12. umferð Pepsi-deildar kvenna í kvöld en Þór/KA liðið var níu stigum og fjórum sætum á undan ÍBV fyrir leikinn.

Karlalið ÍBV steinlá í fyrsta leik eftir Þjóðhátíð en allt aðra sögu var að segja af kvennaliðinu sem átti frábæran fyrsta leik eftir Verslunarmannahelgi.

Þetta var líka langþráður sigur hjá ÍBV-liðinu sem var búið að tapa fjórum síðustu deildarleikjum sínum og hafði ekki unnið leik í meira en mánuð.

ÍBV komst í 1-0 strax á fyrstu mínútu og var 2-0 yfir í hálfleik. Tvö síðustu mörk leiksins komu síðan undir blálokin.

Nadia Patricia Lawrence, Shaneka Jodian Gordon, Vesna Elísa Smiljkovic og Kristín Erna Sigurlásdóttir voru allar á skotskónum hjá ÍBV en fjórða mark liðsins var sjálfsmark.

Upplýsingar um markaskorara eru fengnar frá úrslit.net.