Martin fer til Brooklyn með Elvari Má

Martin Hermannsson, besti leikmaður Dominos-deildar karla í körfubolta, er búinn að ákveða framtíð sína en hann ætlar í háskólaboltann í Bandaríkjunum.

Hann er búinn að gera munnlegt samkomulag við Long Island-háskólann í Brooklyn í New York og mun spila þar ásamt Njarðvíkingnum Elvari Má Friðrikssyni.

„Þetta er búið að gerast mjög hratt. Það kom eitthvað upp á hjá þeim þannig þeir áttu auka skólastyrk. Elvar lét þá ekki vita af mér heldur höfðu þeir samband sjálfir, sem er svolítið skemmtilegt,“ segir Martin í samtali við Vísi.

Long Island-skólinn spilar í NEC-deildinni sem er í efstu deild háskólakörfuboltans í Bandaríkjunum. Liðið vann sína deild í fyrra og komst í NCAA-mótið, það sem allt snýst um, árin 2011, 2012 og 2013.

„Þetta er mjög góður skóli. Strákurinn sem var leikstjórnandi þarna í fyrra var að gera þriggja ára samning við CSKA Moskvu og skotbakvörðurinn samdi við lið í efstu deild á Ítalíu,“ segir Martin en Íslendingarnir fá íbúð saman.

„Við Elvar fáum íbúð saman sem er ekki algengt fyrir leikmenn á fyrsta ári,“ segir hann spenntur en stefnan hjá Martin var alltaf að fara út eftir nýafstaðið tímabil.

„Það var annaðhvort skóli eða Evrópuboltinn. Ég er búinn að tala við marga góða menn og þeir segja mér allir að prófa skólann. Maður tapar engu á því og ég er bara mjög spenntur.“

Martin flytur út 1. september en býst fastlega við því að ná landsliðsverkefnunum í ágúst, verði hann valinn.

Nánar verður rætt við Martin í Fréttablaðinu á morgun.