6 laxar á land fyrsta daginn úr Þverá

Þverá í Borgarfirði opnaði í gær við ágæt skilyrði og lax virðist vera kominn nokkuð ofarlega í ánna.

Það komu 6 laxar á land og annað eins slapp á fyrsta degi í Þverá sem hefur lengi verið ein af bestu laxveiðiám landsins.  Allir laxarnir sem komu á land voru vænir tveggja ára laxar og var stærðin á þeim 80 - 86 sem sem er feyknagott en eins og annars staðar virðist laxinn koma vel haldin úr sjó.  Kirkjustrengur, Klapparfljót og Kaðalstaðahylur gáfu laxa og lax sást á fleiri stöðum án þess að falla fyrir flugum veiðimanna.  Það styttist  í að fyrstu smálaxagöngurnar láti sjá sig í Borgarfirðinum en þá eru veiðitölur fljótar að fara upp og reikna má með, séu göngurnar góðar, að fyrstu 100 laxa hollinn í Borgarfirðinum verði í lok júní eða byrjun júlí.  Það styttist svo í opnun Kjarrár, Grímsár, Laxá í Kjós og fleiri laxveiðiáa en lax hefur sést í þeim öllum svo veiðimenn bíða spenntir eftir því að komast í árnar.