Sherwood: Leikmenn styðja mig

Tim Sherwood, stjóri Tottenham, var ánægður með frammistöðu sinna manna í kvöld þrátt fyrir að liðið hafi fallið úr leik í Evrópudeild UEFA.

Gylfi Þór Sigurðsson spilaði allan leikinn fyrir Tottenham og var nálægt því að skora mark sem hefði getað tryggt liðinu framlengingu.

En leiknum í Portúgal í kvöld lyktaði með 2-2 jafntefli og þar með 5-3 samanlögðum sigri Benfica.

Sherwood gagnrýndi hugarfar leikmanna sinna eftir 4-0 tap liðsins gegn Chelsea fyrr í mánuðinum en kvartaði ekki í kvöld.

„Fólk velti fyrir sér fyrir leikinn hvort að leikmennirnir væru á mínu bandi,“ sagði Sherwood eftir leikinn í kvöld.

„En það var augljóst að þeir styðja mig. Þeir börðust fyrir málstaðinn og þessi skammarræða mín skaðaði þá ekki. Þeir sýndu hvað býr í þeim og þurfa að gera það áfram til loka tímabilsins.“

„Það eru margir erfiðir leikir eftir en ég er sannfærðir um að strákarnir munu áfram sýna sitt rétta andlit.“