Ásgeir: Förum með höfuðið hátt í milliriðilinn

Ásgeir Örn Hallgrímsson lét heldur betur til sín taka í leiknum gegn Spánverjum. Skoraði góð mörk og ekki hægt að kvarta yfir hans frammistöðu.

"Þetta er virkilega svekkjandi miðað við hvernig þetta var að þróast. Það var klaufalegt að missa þriggja marka forskotið strax niður. Að ná ekki að halda út lengur. Við vissum að þetta yrði virkilega erfiður leikur og að við yrðum að spila vel í 60 mínútur en ekki 50. Því fór sem fór," sagði Ásgeir grautfúll.

"Ég er nokkuð sáttur við riðilinn. Ef við hefðum unnið Ungverja þá hefði ég verið enn sáttari. Við förum héðan með margt gott í farteskinu og við gleymum því ekkert þó svo við höfum tapað þessum leik.

"Við þurfum að fara með höfuðið hátt í milliriðilinn. Þar verða lið sem henta okkur vel. Leikirnir gegn Dönum hafa alltaf verið hörkuleikir og það verður örugglega rosalega gaman að spila í Herning."