Ólafur: Ég náði hrollinum úr mér

Ólafur Andrés Guðmundsson steig fram á stóra sviðið með miklum látum í kvöld. Hann skoraði sex glæsileg mörk og sýndi hvað í honum býr.

"Þetta var flottur leikur og virkilega gaman að fá að spila svona mikið. Mér fannst ég spila ágætlega. Ég kom með mitt sjálfstraust sem ég hef fengið í Svíþjóð og reyndi að spila minn leik og aðlagast liðinu," sagði Ólafur hógvær en hann var valinn maður leiksins.

Þar sem Ólafur fór mikinn gat Aron landsliðsþjálfari leyft sér að hvíla Aron Pálmarsson nánast allan leikinn en hann þurfti sárlega á hvíld að halda.

"Okkur veitti ekkert af því að auka breiddina í liðinu. Aron og Arnór báðir þreyttir og lemstraðir. Það hefur verið mikið álag á þeim og mikið eftir. Það var því lífsnauðsynlegt að spila á liðinu.

"Það var sérstaklega ánægjulegt að halda gæðunum í liðinu þó svo við höfum rúllað því mikið. Þetta sýnir bara gæðin í okkar liði og eigum að vera stoltir af því.

"Það er alltaf erfitt að koma inn í nokkrar mínútur og betra að fá nánast heilan leik. Ég náði hrollinum úr mér núna. Nú verður kannski auðveldara fyrir mig að koma inn í framhaldinu."