Ungverjar ekki sannfærandi í aðdraganda EM

Það er ekki bara Ísland sem er í vandræðum í undirbúningi sínum fyrir EM því mótherjar Íslands - Noregur og Ungverjaland - hafa einnig verið að lenda í vandræðum.

Norðmenn hafa tapað flestum leikjum sínum í aðdraganda EM en fengu þó jákvæð úrslit í gær er liðið stóð í Frökkum og tapaði með einu marki.

Ungverjar voru allt annað en sannfærandi á sínu æfingamóti um helgina. Liðið tapaði fyrir Tékkum, marði sigur á Hvít-Rússum og steinlá síðan gegn Pólverjum með sjö marka mun.

Þeirra besti maður Laszlo Nagy verður ekki með á EM og Ungverjar hafa einnig áhyggjur af annarri stjörnu liðsins, Gabor Csaszar, en hann er ekki í mikilli leikæfingu. Hann spilar nefnilega ekki mikið fyrir lið sitt, PSG, rétt eins og félagar hans hjá liðinu þeir Ásgeir Örn Hallgrímsson og Róbert Gunnarsson.

Hinn 23 ára gamli leikmaður Pick Szeged, Gabor Ancsin, mun leysa Nagy af á mótinu og eru það stór spor að fylla enda Nagy frábær á báðum endum vallarins.

Það hafa verið meiðslavandræði á Ungverjum og liðið fékk fjóra leikmenn til baka úr meiðslum um helgina.

Engu að síður hafa fjölmiðlar í Ungverjalandi áhyggjur af líkamlegu ástandi liðsins og hvort það geti spilað í 60 mínútur á fullu gasi.

"Það er engin spurning að við þurfum að vinna í líkamlega þættinum. Það bíður okkur dauðariðill á EM og þar megum við ekki við því að lenda í löngum vondum köflum," sagði Csaszar.