Bless, Sigmundur Davíð

Einu sinni átti mamma mín leiðinlegan pennavin sem hún nennti ekki að skrifast á við lengur, svo hún skrifaði honum bréf með vinstri hendinni sem vinkona sín og sagðist sjálf hafa látist í bílslysi.

Ég slæ þér þetta bréf með báðum höndum til að ljúka því sem aldrei varð. Ég hef ekki gefið upp öndina en ég hef gefist upp á þér. Sá illi grunur læðist að mér að seinagangi póstþjónustunnar sé ekki um að kenna að ég hef ekki fengið frá þér svar heldur hafir þú tekið meðvitaða ákvörðun um að leiða mig hjá þér. Það er næstum jafn leiðinlegt og það er móðgandi. Gleðibanki minn er tómur – þú leggur ekkert inn, tekur bara út.

Þú ert vonlaus pennavinur Sigmundur og mér finnst þú vonlaus forsætisráðherra af sömu ástæðu. Ef það er eitthvað sem hefur afhjúpast undanfarin ár er það þörfin fyrir stælalaus stjórnmál og opin samtöl.

Það eru fleiri en ég í þeim sporum að botna ekkert í þér, fleiri sem bíða eftir svörum, útskýringum á því hvernig þú ætlar að framkvæma allt sem þú hefur lofað og af hverju þú framkvæmir það sem þú svo framkvæmir. Hvernig getur þú til að mynda réttlætt að leggja laumulega niður umhverfisráðuneytið og afnema sérstaka veiðigjaldið?

Fjárlagafrumvarp þitt endurspeglar forna og heimskulega forgangsröðun. Þú elur á þjóðerniskennd og talar um þjóðmenningu en skerð í sömu andrá niður til menningar og lista. Fjárlög til landbúnaðar aukast þó verulega. Það hefur enginn sigrað heiminn með niðurgreiddri lambakótilettu Sigmundur en hugvit er lykillinn að ansi mörgum lásum.

Þú ert lýðræðislega kjörinn fulltrúi en ekki kóngur og sem slíkur skuldar þú okkur samtal og útskýringar á því sem þú gerir í okkar nafni. Um daginn baðstu okkur í ræðu um að ímynda okkur fyrirmyndarland sem við gætum stefnt að. Vandinn er, Sigmundur, að ímyndi ég mér slíkt land þá ert þú ekki forsætisráðherra þar.

Ég sé nú að allar líkingar á samskiptum okkar við kvikmyndir eru fráleitar. Við eigum ekkert sameiginlegt með hreinskilni persónanna í Clueless eða samheldni elskendanna í Titanic. Samtal okkar er andvana fætt, handrit í tómum Kvikmyndasjóði.

P.s. Hvort finnst þér betri Wham eða Duran Duran? Djók mér er sama.