Trúarbrögð á tíu mínútum

Um daginn vaknaði ég kl. 7.15 eins og vanalega. Ég fór fram úr en kl. 7.17 fór ég að hugsa um hvað ástandið í heiminum væri slæmt.

Klukkan 7.18 var ég búinn að komast að því að það væri trúarbrögðum að kenna því trúarbrögð eru orsakir næstum allra styrjalda í heiminum.

Kl. 7.19 var ég harðákveðinn í því að best væri að útrýma öllum trúarbrögðum. En kl. 7.20 hugsaði ég: Það eru ekki trúarbrögð sem eru kjarni vandans heldur vanþekking. Það þýðir ekki að lýsa yfir stríði gegn trúarbrögðum. Það æsir fólk bara upp. Betra væri að upplýsa fólk því upplýst fólk lætur skynsemina ráða för og hafnar trúarbrögðum.

Ég tók mig því til og gerði áætlun sem gekk út á að taka saman helstu alfræði- og vísindarit og dreifa þeim til sérhvers jarðarbúa. Klukkan var 7.21 þegar ég var búinn að smíða þessa áætlun.

En klukkan 7.22 komst ég að því að þetta myndi bara valda ruglingi. Ekki er hægt að ætlast til þess að venjulegt fólk skilji afstæðiskenningu Einsteins og hvað þá hugmyndir Schopenhauers um frjálsan vilja. Það þyrfti að útskýra vísindin á mannamáli, t.d. með dæmisögum.

Kl. 7.23 var ég kominn á þá niðurstöðu að það þyrfti að vinna úr þessum upplýsingum og koma þeim helst fyrir í einni stórri bók sem væri full af visku og dæmisögum. Hún mætti ekki vera of þykk, helst bara eitt bindi, en ef blaðsíðurnar væru þunnar væri alveg hægt að rúma þar u.þ.b. 1.500 síður. Kl. 7.24 var ég sannfærður um að best væri líklega að þessi bók væri eins hlutlaus og einföld og mögulegt væri. Best væri bara að hafa hana svarta og hafa einfalt tákn framan á henni sem allir í heiminum myndu skilja.

Kl. 7.25 var ég byrjaður að semja ritningar upp úr nýju bókinni minni og teikna samkomuhús í huganum þar sem ég gæti predikað boðskap minn.

Ég lagðist aftur í rúmið, snoozaði til 7.30, fór svo á fætur og fékk mér kaffi.